Gaduah Pancasila

Subuah neniang alah tajadi parang dunia katigo antaro si Surti jo minah di sumuah kampuang. Antah apo nan alah nyo ribuak an di urang baduo ko. Mode kicau murai baranak tujuah urang ko. Pakak talingo urang sakampuang dibuaknyo.

“Lai jaleh di Kau. Denai baarok nagari awak ko ha manjadi nagari pancasila, menggenduang nagara pancasila,” Surti berkacak pinggang. Ditantangnyo Minah. Ditunjuak-tunjuaknyo puncak hiduang Minah.

“Lai jo moncuang kau mangecek. Den sumbek muncuang kau ko jo sabun balok ko. Sumbarang se mangecek bibia kau. Pandai pulo mangecek an kito-kito ko indak pancasila.”

“Tasarah den lah mangecek. Manga pulo kau nan ribuak. Kito alah lamo merdeka. Tapi alum juo manjadi nagari pancasila. Caliaklah urang di lua nagari awak ko, alah makmurnyo, dek garah-garah alah manjadi nagari pancasila nan mandukuang nagara pancasila.”

“Labiah pulo muncuang ko dari biso ula gadang. Mangecek sumbarang angkek. Ndak ado isi utak kau, Surti. Kau kecek an nagari kito indak nagari pancasila. Apo bana isi utak kau tantang pancasila. Alah jaleh kito sabalum merdeka nagari ko alah pancasila nagari ko. Lai jaleh di kau. Makonyo iyo urang lah iyo kecek kau. Itu samo jo kabau dicucuak hiduang kau mah.”

“Apo kecek kau. Racun muncuang kau mah Minah.”

“Muncuang kau nan racun, Surti. Lai jaleh di kau Indonesia ko lahia dek nagari kito nan pancasila sabalum Indonesia ko lahia. Kau kecek lalok-lakok karajo rang nagari kito. Batitiak paluah urang nagari ko memperjuangkan negara ko, kau kecek an pula nagari kito indak pancasila. Kau bacolah sejarah elok-elok baru mangecek. Ko muncuang baciriak itu juo nan kaluan. Samo jo boto kau mah.”

“Tasarah kau lah. Muncuang, muncuang den.”

“Dek garah-garah urang mode kau lah urang jadi bagaduah.Makonya jalang mangecek pikiah masak-masak dolu. Ko apo nan takana itu nan kau kecekan. Kito di nagari ko tumpah darah bajuan jo pancasila. Niniak jo angku banyak nan maningga supayo nagara pancasila lahia. Urang-urang awak banyak nan matian-matian sakolah ka Ulando, barat, arab, untuk menagakkan pancasila lahia di nagari kito, jadi tonggak tuo nagara kito. Sia-sia urangnyo ndak pulo paralu den jalehan ciak-ciak kah kau. Kau bacolah sejarah, baru kau tanganga, kalau indak dek urang nagari kito alum katantu lahia Indonesia, alum tantu ado pancasila. Lai jaleh dek kau. Mantang-mantang kau lah bapolitik sakalamak kau sajo mangecek. Bisuak-bisuak kau ulang juo mode den sumbek jo minyak angek muncuak kau. Bia indak bisa kau mangecek lai.”

Surti jo Minah baliak dari rayia jo kapalo angek. Sapanjang jalan urang baduo ko bagaduah taruah tantang pancasila dalam kapalo masiang-masiang. Mode ka nyo luluah sagalo nan inyo lalui.

ALIZAR TANJUNG

Published by Alizar Tanjung

Leave a Reply

Your email address will not be published. Required fields are marked *